HALMASHAURI YA WILAYA YA NYANG’HWALE YAGAWA PIKIPIKI KWA WATENDAJI WA KATA.

Posted on: November 17th, 2022

Ili kukabiliana na uhaba wa Vyombo vya Usafiri, Halmashauri ya Wilaya ya Nyang’hwale imenunua Vyombo vya Usafiri (Pikipiki) kwa ajili ya Watendaji wa Kata. Ofisi ya Mkurugezi Mtendaji wa Halmashauri imenunua Pikipiki Sita (6) kwa kutumia Mapato ya Ndani (Own Source). Pikipiki hizo zimegawiwa kwa Watendaji wa Kata 6 kati ya Kata 15. Watendaji waliogawiwa Pikipiki hizi ni pamoja na Mtendaji wa Kata ya Nyabulanda, Shabaka, Nyamtukuza, Nundu, Nyang’hwale na Kharumwa.

Akigawa pikipiki hizo, Kaimu Mwenyekiti wa Halmashauri Mhe. Masumbuko P. Kubola Diwani wa Kata ya Nyabulanda alisema lengo la Halmashauri la kununua pikipiki ni kufikia lengo la kukusanya Mapato kwa kiwango kinachotakiwa na kwa haraka. Pia kurahisisha uwajibikaji na utendaji kazi kwa wahusika, kufika eneo la kazi kwa wakati, Kuandaa na kukusanya Taarifa kwa wakati na kuzifikisha Ofisini.

Aidha Kaimu Mkurugenzi Mtendaji wa Halmashauri Ndg. Mwizarubi Edwin Nyaindi alisisitiza Pikipiki hizi zinatakiwa Kuendeshwa kwa Kuzingazia Sheria, Taratibu na Kanuni za Uendeshaji wa Vyombo vya Moto. Sambamba na hili alisema Ofisi yake imeandaa Mafunzo kwa Watumishi wote ambayo yatatolewa kuanzia tarehe 18/11/2022 muda wa jioni katika Ukumbi wa Halmashauri. Haitaruhusiwa kwa Mtendaji yoyote kuendesha Vyombo hivyo pasipokuwa na leseni ya udereva.