HATI ZA HAKIMILIKI ZA KIMILA 838 ZATOLEWA KWA WANANCHI WA BUJULA MIYENZE NA IHUSHI

Posted on: January 27th, 2026

Halmashauri ya Wilaya ya Nyang’hwale kwa kushirikiana na Tume ya Taifa ya Mipango na Matumizi bora ya ardhi imetoa Hati za hakimiliki za kimila 838 kwa Wananchi wa Vijiji vya Bujula Mienzi na Ihushi.

Mkuu wa Wilaya ya Nyang'hwale Mhe. Grace Kingalame akikabidhi hati za kimila kwa Wananchi

Hafla ya utoaji wa hati hizo imefanyika jana Januari 26, 2026 katika Kijiji cha Bujula Mienze kilichopo Kata ya Shabaka.

Mkuu wa Wilaya ya Nyang’hwale Mhe. Grace Kingalame, ameishukuru Tume ya Taifa ya Mipango ya Matumizi bora ya Ardhi na Wataalamu wa Halmashauri kwa kuwezesha ukamilishwaji wa mchakato mzima wa upangaji, upimaji na umilikishaji wa Viwanja katika Vijiji vya Bujula mienze na Ihushi.

Mkurugenzi wa Usimamizi na ufuatiliaji wa Tume ya Taifa ya Mipango ya Matumizi ya Ardhi Ndg. Jonas Masangija (kushoto) akipokea cheti cha shukran kutoka kwa Mkuu wa Wilaya Mhe. Grace Kingalame (kulia)

Mhe. Kingalame amesema Tume ya Taifa ya Mipango ya Matumizi bora ya ardhi ilikubali ombi la Halmashauri kushiriki katika maandalizi ya mpango wa matumizi bora ya Vijiji 23 kati ya vijiji 62 vya Wilaya, ambayo ni saw ana asilimia 37%.

“Kupitia fursa hii, jumla ya hati za hakimiliki za kimila 838 zimeandaliwa ambapo Kijiji cha Bujula mienze zimeandaliwa hati za hakimiliki za kimila 541 na Kijiji cha Ihushi hati za hakimiliki za kimila 297” Amefafanua

Mkurugenzi wa Usimamizi na ufuatiliaji wa Tume ya Taifa ya Mipango ya Matumizi ya Ardhi Ndg. Jonas Masangija amesema lengo la zoezi la kufanya mpango wa matumizi bora ya ardhi na utoaji wa hati za hakimiliki za kimila kwa Wananchi wa Vijiji hivyo ni kuondoa migogoro ya mipaka ya ardhi baina ya Wananchi.

Kwa upande wake Mkurugenzi Mtendaji wa H/W ya Nyang’hwale Ndg. Husna Toni amemshukuru Mhe. Dkt. Samia Suluhu Hassan kwa kuridhia kuwapa Wananchi ardhi yenye ukubwa wa ekari 3,101 iliyokua imevamiwa kwenye hifadhi ya pori la Mienze.

Pamoja na mambo mengine, Mkurugenzi Mtendaji amewataka Wananchi wa Vijiji hivyo kuheshimu mpango wa matumizi bora ya ardhi ambao umeainisha matumizi ya kila kipande cha ardhi ikiwemo makazi, kilimo, mifugo, maziko na shughuli zingine za maendeleo.