WANANCHI WAKABIDHIWA MIRADI MIWILI YA TASAF

Posted on: May 25th, 2023

Wananchi wa Kata za Shabaka na Nyijundu zilizopo Halmashauri ya Wilaya Nyang’hwale,wamekabidhiwa miradi miwili ya maendeleo iliyotekelezwa na Mfuko wa Maendeleo ya Jamii, TASAF. Miradi hiyo iliyokamilika imekabidhiwa jana Mei 24, 2023 na Katibu Tawala Wilaya, akishirikiana na Mkurugenzi Mtendaji Wilaya, pamoja na Kamati ya ulinzi na usalama ya Wilaya.

Miradi hiyo miwili ni bweni la wanafunzi wasichana wa Shule ya Sekondari Nyijundu iliyopo kata ya Nyijundu, lenye uwezo wa kuchukua wanafunzi themanini (80) na nyumba moja yenye Uniti (Apartment) mbili iliyopo Shule ya msingi Wenzura kata ya Shabaka.

Akiwasilisha taarifa za miradi hiyo, Mratibu wa TASAF Wilaya, Bw. Dalius Nyanda, alisema kuwa mradi wa jengo la bweni umegharimu kiasi cha Tsh. 157,328,023.54. na jengo la nyumba ya walimu umegharimu kias cha Tsh. 92,410,714.29. Pia, ujenzi wa majengo yote hayo mawili umehusisha nguvu na michango ya jamii.

Aidha, Katibu Tawala Wilaya ya Nyang’hwale, Bw. Fabian Yinza aliwasihi wanafunzi na walimu kuitunza miundombinu ya majengo hayo kwa kuzingatia matumizi bora, usafi, na utunzaji wa mazingira kwa kupanda miti maeneo yote yanayozunguka majengo yote ya taasisi.

Sambamba na hilo aliwasisitiza viongozi wa vijiji, kata na watendaji mbalimbali wa Halmshauri, kusimamia utekelezaji wa miradi hiyo ya maendeleo kwa kuzingatia thamani ya fedha, muda wa mradi kukamilika, na kufuata taratibu za manunuzi.

Mkurugenzi Mtendaji wa Halmashauri ya Wilaya ya Nyang’hwale, Bi. Husna Toni aliwahimiza wananchi kujitolea nguvu zao na kuchangia fedha, ili kuunga mkono juhudi za serikali katika kutekeleza miradi mbalimbali ya maendeleo inayoendelea kutekelezwa. Pia, aliwasisitiza wazazi na wanafunzi kuchangamkia fursa ya uwepo wa bweni kwa kuhakikisha wanafunzi wananufaika na uwepo wa bweni hilo.

Katibu Tawala Wilaya alimalizia kwa kutoa shukran za dhati kwa Raisi wa Jamhuri ya Muungano wa Tanzania, Mhe. Dkt Samia Suluhu Hassan kwa kutenga fedha kila mwaka kwa ajili ya miradi ya maendeleo Wilaya ya Nyang’hwale. Pia, aliwasihi wanafunzi, walimu na wazazi kushirikiana kudhibti vitendo vyote vinavyosababisha kuzorota kwa taaluma, ikiwa ni pamoja na utoro, mimba kwa wanafunzi na ndoa za utotoni.